अक्कलकोटनिवासी स्वामी समर्थ महाराजांनी १३५ वर्षापूर्वी देह विसर्जित केला. तेव्हांपासून ते भक्तांना धीर देत त्यांच्या प्रापंचिक अडचणी सोडवण्यास प्रेमाने मदत करीत आहेतच. परंतु त्याच बरोबर त्यांना असंख्य भक्तांच्या सर्वांगीण उन्नतीची जास्त कळकळ वाटते. आता त्यांना देहाचं बंधन नसल्याने ते अनेक उन्नत भक्तांच्या माध्यमातून स्वत: कार्य करतात. प्रस्तुत समयीं श्री स्वामी समर्थ औरंगाबाद शहरात रहाणार्‍या परमपूज्य श्री. शरद बळवंत लाठकर नामक सत्पुरुषांच्या वाणीतून रोज ठराविक वेळेस प्रवचन करतात. एकही दिवस खंड नाही. एक ही दिवस सुट्टी नाही. ह्या प्रवचन सत्राला स्वामींनी ” संचार प्रबोधने “असे नांव दिले आहे. हे दिव्य ज्ञानसत्र इ.स. १९८८ मध्ये सुरू झाले. इ.स. २००५ पासून ही प्रवचने ध्वनिमुद्रित करण्यास सुरुवात झाली. आज असंख्य संचार प्रबोधने भक्तांना ऐकण्यासाठी, तसेच अभ्यासासाठी ध्वनिमुद्रित स्वरूपात उपलब्ध आहेत. मी कांही मोजक्याच विषयांवरील प्रबोधनांचा अभ्यास केला. मला प्रबोधनांतील विचारांची स्पष्टता जाणवली आणि आवडली. संभ्रमाला थाराच नाही. अनेक सिध्दांतांचे गूढ अर्थ, अनेक तत्वरहस्ये स्पष्टपणे उलगडून समजावली आहेत. मला स्वत:ला श्री स्वामी समर्थांची खोलात शिरून समजावण्याची पद्धत फारच आवडली. ऐवढं मोठ्ठं घबाड हाती लागल्याचा अत्यानंद झाला. त्याच बरोबर ह्या सगळ्या ज्ञानभांडाराचा अभ्यास करण्याची उत्कट इच्छा निर्माण झाली.  ऊर्वरित आयुष्य ह्या अभ्यासा साठी तसेच स्वामीसेवेसाठी वेचण्याचा निश्चय केला. हे ज्ञानभंडार सर्व जिज्ञासूंसाठी खुले करण्याचे ठरवले. श्री स्वामी समर्थांनी सुध्दा खुल्या दिलाने आशिर्वाद दिला. तसेच ह्या ज्ञानभांडाराचा सर्व जगतात प्रचार करण्याची आज्ञा केली.